இரகசியம் கசிந்தது !

அந்தியும் தனிமையும் பெண்மையும் குறித்த கவிதை

 வெண்பஞ்சு மேகங்களை மஞ்சள் சூரியன் 

மஞ்சனம் ஆட்டிப்  

பொன்னொளி கூசும் வேளை,

அஞ்சனம் பூசவிருக்கும் அந்தி வானம் 

என்னை வெறித்துப் பார்த்தது.

நானும் அதைப் பார்த்துப் 

பல இரகசியங்களைப் பகிர்ந்துகொண்டேன்!

என் இன்ப துன்பங்களையும் பகிர்ந்தேன்!

என்னுரை உரையாடலுக்கு ஏற்ப அதுவும் 

நிறங்கள் வழி நவரசங்களைப் பொழிந்தது,

எங்கள் உரையாடலை, நாங்கள் 

அறியாமலேயே ஓர் ஒற்றன் 

கிளைகளின் இடையில்,

இலைகளாய் மறைந்து

கேட்டுவிட்டான் என்பதைக் 

காலை எழுந்து கேட்ட

குயிலோசை வழி அறிந்தேன்!

பெண்ணின் இரகசியம் தெரிய 

வேண்டுமானால்,

வானின் வர்ண இலக்கணம்

 பயில வேண்டும்!

குயிலின் பாஷை புரிய வேண்டும் !