பெறுவோமா நாம் ?

சிறு சிறு நிகழ்வுகள் அல்லது சுகங்கள் மானுடத்திற்கு வாய்க்காமல் போவது பற்றிய கவிதை

வானம் கொடுத்த பெருமழையில்

தானம் வாங்கும் வறியோனாய்

நீரில் நனைந்த இலைமேனி

பெருமரத்தில், ஓயாமல் சொட்டும்

ஒருதுளி நீர்போல்

பெறுவோமா நாம்

பெருவாழ்வில் சுகம் ?

 

மார்கழித் திங்கள் தன்னில்

பார் வானம் அருளே போல்

புவி மயிராம் பசும்புல்லில்

பொய்யாமொழிக்கு உவமையாய் நின்ற

நுனி தங்கிய பனித்துளிபோல்

பெறுவோமா நாம்

பெருவாழ்வில் சுகம் ?

 

வெண்மையும் மஞ்சளும் சேர்ந்த திரவமாய்

வெண்ணிற ஓட்டினுள் அதனை இருப்பாக்கி

இரவும் பகலும் பெடை கோழி கதகதப்பில்

துறவு கொண்ட பெருமகானைப் போல்

ஓடுடைத்து வெளிவரும்

ஒற்றைப் பிஞ்சுயிர்போல்

பெறுவோமா நாம்

பெருவாழ்வில் சுகம் ?