எல்லாம் ஒருதுளியில்

மழையின் ஒருதுளி நீரில் விழுந்து ஒருசிறிய குமிழியை ஏற்படுத்தி மறுகணமே மறைவது போல் தான் வாழ்வின் நிகழ்வுகள் எனக் கூறும் கவிதை இது

 

புது உலகம் காணவரும்

        புத்துயிரின் அறிவிப்பில் ஒருதுளி !

மறு உயிர் ஈன்றெடுத்த

        மாதாவின் புன்னகையில் ஒருதுளி !

 

விதை மண்முட்டி ,செடியாய்

        வளர வழிதந்தது ஒருதுளி !

கரை இரண்டு உடைக்கும்

        வெள்ளத்தின் ஆதி ஒருதுளி !

 

பெருமகன் ஆனான் இவனென

       பெருமை பேசும் ஒருதுளி!

கல்வி கற்கக்கற்க கரை

      கண்டவனின் அறிவில் ஒருதுளி!

 

குறை கூறுவார் முன்னில்

       பகட்டு நடைகொள்வது ஒருதுளி !

குறைகண்ட நேரம் நாணிக்

      குறுகும் வேளை ஒருதுளி !

 

மண்ணுயிர் கொடுத்த

     மாதா ஓய்வில் ஒருதுளி !

இன்னோர் உயிர்கொடுத்த

    மனைவி மீதில் ஒருதுளி !

 

அறியா உறவுகள், சேரும்

    வேளையில் ஒருதுளி !

அறிந்த உறவுகள் ,பிரியும்

    வேளையில் ஒருதுளி !

எங்கும் எதிலும் பற்றற்று

     ஞானம் பொங்கும் வேளை ஒருதுளி !

மங்கும் கண்ணும் வளைந்த

      கூனும் பரிசளிக்கும் காலம் ஒருதுளி !

 

கடந்த கால நிகழ்வுகளின்

     காட்சிப்படம் கரைந்தபடி ஒருதுளி !

கிடந்தபடியே காற்றில் யாவும்

     கரையும் கடை நொடி ஒருதுளி !