இறகு

இறகை விதியெழுத அழைக்கும் கவிதை

 

இறகே! என்னை எழுத வா!

எத்துணையோ பேருக்கு 

எழுதியிருக்கிறாய்

அவரவர் கதாபாத்திரத்தை !

என்னையும் இறகே,

எழுதவா இங்கே !

உனக்குத் தேவையான 

மையை, என் உடலில்

 இழைந்த உதிரத்தை உறிஞ்சி 

ஒரு கண்ணாடி கோப்பையுள் 

ஏந்தி வைக்கிறேன்,

என்னையும் இறகே ,

எழுதவா இங்கே !

வருவதற்கு நீ

வழிதவறாமல் இருக்க 

உன் கண்ணின் 

ஒளியை நான் 

பிரதிபலிக்கிறேன்!

என்னையும் இறகே,

எழுதவா இங்கே! 

பாதையில் முட்கள் உன்னைப் 

பதம்பார்க்காமல் இருக்க ,

எனது கூந்தலாகிய 

கம்பளத்தை  விரித்து 

உன் நுனி முள்ளைக் காப்பேன்,

என்னையும் இறகே !

எழுதவா இங்கே!

போன முறை என்விதியை 

முடித்து உடைந்தது ஓர் இறகு,

இம்முறை என்கதையைத் 

தொடங்கி வைக்க 

எழுதவா இறகே ! 

ஏங்குகிறேன் இங்கே !