அமைதி

போர்கள் ,யுத்தங்கள் இல்லா உலகை வேண்டும் கவிதை

 

மனது கனக்கிறது !

எரிந்து துடிக்கிறது !

மணிக்குயில் கீதம்போல்

மனதிற்கு அமைதி வேண்டும் !

 

பருத்திப் பஞ்சிற்குள்

பனிக்காற்றை நிரப்பி ,

படுத்து உறங்கிட

அமைதி வேண்டும் !

 

மேகத் துகள்களை

மெதுவாய் சேமித்த

மெத்தையில் அமர

அமைதி வேண்டும் !

 

கதிரவன் குளித்த நீரில்

குதித்து , குறுவுடல் நனைந்து

சிறகு படபடக்கச் சிதறும் துளிகளுடன்

புறாவினை இரசிக்க

அமைதி வேண்டும் !

 

வெண்ணிலா வெந்துருகி,

மண்ணில் எங்கும்

காணும் இடமெல்லாம்

அணை உடைக்கும் பெருக்கெடுக்க

அமைதி வேண்டும்!

 

மழைத்துளி தொடும் கணம்

மோட்சம் பெற்று

வெண்மை கூசிடும்

தும்பை நனைய ,

அமைதி வேண்டும் !

 

பூத்திடும் ரோஜாக்களில் ,

புன்னகைக்கும் பனித்துளிகள்

சூரியன் வந்தபின்

சுருண்டோடி கிளம்ப ,

அமைதி வேண்டும் !

 

வெண்ணிறத் தாளின்

வறுமை போக்கிட ,

எழுத்துக்களை ஏர்பூட்டி

உழவு செய்ய உலகிலோர்

அமைதி வேண்டும் !