என்ன காரணம்?

கடலோரம் ஆசுவாசிக்கும் நிலை பற்றிய கவிதை

 

வானின் நெற்றித்திலகம்

வழிந்து கரைந்தோட ,

வங்கக் கடலில்

அலை சறுக்கிய காற்று ,

ஈரத்துணியை உதறுவதுபோல்

என்மேல் சில்லிட

என்ன காரணம் ?என்னை

வரவேற்கிறதா ? வசைபாடுகிறதா ?

 

பூமியில் பிறந்த

பாதங்கள் யாவும் ,

அலையின் சீலை வந்து

அழிக்கும் என்று தெரிந்தும் ,

ஈரமணலில் தங்கள்

இருபாதங்களைப் பதித்து ,

நிலையில்லா பயணத்தை

நிறைவேற்ற என்ன காரணம் ?

சுவடுகள் அழியும் சுகம் கண்டதாலா ?

சுவடுகள் பதிப்பதில் சுகம் கண்டதாலா ?

 

அலைகடலில் என்றோ

அயராது மீன்பிடித்து ,

அலைகளில் ஏற்றங்கள்

துயரங்கள் பலகண்டு, இன்று

மூக்குடைந்து கொம்புடைந்து

இற்றுப்போய்ப் பயனற்றுப்போய்

கரையொதுங்கிய பிணம்போல்

கவிழ்த்துக் கிடக்கும் இந்த ஓடம் ,

இதற்கு என்ன காரணம் ?

வாழ்வின் சுகமே தத்தளிப்பா ?

உழைப்பின் அடையாளம் ஒதுக்கப்படலா ?