சங்கம்

தமிழ்ச் சங்கம் பற்றி கூறும் கவிதை

கொங்கு தேர் வாழ்க்கை என்னும் 

கூந்தலின் காவிய பாடலைப் பாடி ,

நக்கீரன்  என்பவன் குற்றம் கடியத் 

தான் யார் என்று சிவனவன் 

நுதலின் வழியே 

நுவலும் விழி திறந்த 

சங்கம் இது ! 

கடலில் மிதக்கும் 

கதிரவன் ஒளியும் 

கணக்கிட்டுக் கண்டறியா 

காலத்தவளை , எடுத்து வளர்க்க 

கடலாடிய முத்தை அமுதம்போல் 

கடைந்தெடுத்த பாண்டியர்கள் 

காலத்தை விழுங்க அமைத்த அவை இது !

இருள் வந்து சூழ்ந்து என் இனியவளை 

ஏசுவதற்கு முன் , களப்பிர கள்வர்கள் 

இவளுக்குப்  பரிசாய் கொடுத்த 

 

நூற்றாண்டு மௌனங்கள் 

 

இவளை நசுக்குவதற்கு 

முன் கொண்டாடிய 

 

சங்கம் இது !

காற்றில் 

கலந்த ஈரங்கள் 

இவளின் கவிகளைக் கேட்டால் 

குளிர் காயும் !இந்த கடைக்கோடி ஈரங்கள் ,

கடலலையாய் பெருக்கெடுக்க 

அடைக்கலமானது இந்தச் சங்கம் !

இலையில் பாயும் நரம்புகளும் ,

இவளின் எழுத்தைச் சித்தரிக்கும் !

இதழில் இழைந்த வண்ணங்கள் 

யாவும் இவளின்

 இளமை காட்டும் !

காட்டாற்று வெள்ளம் போல் 

அணையை உடைக்கவே ,

இவளை அரவணைத்து 

வளர்த்தது சங்கம் !

தமிழை மட்டும் வளர்க்காமல் 

தமிழர் வாழ்வையும் வளர்த்தது சங்கம் !