தமயந்தி

தமயந்தி கவிதை

தாமரைத் தடாக 

இலைகள் இடைமறித்து ,

எங்கே போகிறாய் 

என்று கேட்டும் 

இரகசியம் என உங்கள் இருவர்

தூதின் கண்ணியம் 

காத்த அன்னத்தை 

வந்தனங்கள் பல சொல்லி 

நீ கேட்பது என்னடீ !

தமயந்தி ,

நள மகாராஜனின் 

நல விசாரிப்பா?

எங்களுக்குத் தெரியாத 

இரகசியம் ,இங்கு 

என்னவிருக்கிறது என 

லாவண்யங்கள் கொஞ்சும் 

தாமரை  இதழ்கள் ,

நாணத்தால் சிவந்து 

அந்தச் சாயத்தைத் 

தடாகத்திலும் கரைக்க,

இந்நிகழ்வை யாதொன்றும் 

அறியாமல் ,இன்னும் 

அங்கயற்கண் இமைக்காமல் நீ 

அன்னத்தை 

கேட்பதென்னடீ !  தமயந்தி ,

நள மகாராஜனின் 

செம்மேனி சாயமா?

உங்களின் உரையாடல் 

வைத்து காற்றிலேயே 

குயில்கள் காவியம் பாடி 

முடிந்துவிட்டன,

உங்களின் இரகசியம் 

கசிந்து தமிழ் ராணியின் 

கட்டளை பேரில் 

உனது புகழேந்த, வெண்பா 

முத்துக்களைப் புகழேந்தி புலவன் 

சிதறவிட்டும் முடித்துவிட்டான் !

இத்துணையும் அறியாமல் 

இன்னும் நீ அன்னத்தை

அவஸ்தை படுத்துவது ஏனடீ !

தமயந்நி ,

நள மகாராஜன் 

நங்கைக்குக் கொடுத்துவிட்ட 

ஓலையை அன்னம் தொலைத்து 

விட்டதாலா?