சுந்தர காண்டம்

இராமாயணத்தில் சீதையை மீட்கும் சூடாமணி போன்று தற்கால பெண்களை மீட்பது கல்வியே என்பதன் நிலை கூறும் கவிதை

 

மண்ணில் துகளாகி , 

மிதிலை மன்னின் மகளாகி,

ஆற்றாத ஜனகன் 

கவலையைத் துடைத்தெடுத்துப் 

பிறந்த போதும் 

மண்ணை பொன்னாக்கிப் 

பிரவேசித்தாய் நீ !

உன் வருங்காலக் 

கணவனுக்காய் காத்துவந்த,

சிவனேந்திய தனுசை 

எவன் ஏந்துகிறானோ,

அவன் தான் வென்றவன் ,

இவள் தன் கணவன் 

என்றான் உன் ஜனகன் !

அதை எடுத்து மேலேந்தி 

அனைவரின் கண்ணிலும் 

வியப்புக்குறியை நாணேற்றி ,

வீண் தூற்றலை வில்லாய் உடைத்தான் !

 அப்போது நீ ,

அனைவரின் முன்னும் 

புயலாடும் கிளைபோல் 

ஆற்றாத நாணம் கொண்டு 

அரங்கத்தில் பிரவேசித்தாய் !

அங்கொரு நகரானது ,

அல்லோலகல்லோலப் பட்டது ,

உன் மண வைபோகம் 

வையத்தில் பிரகாசிக்க ,

சகல பொருட்களும் 

பொன்னால் மின்னும்போது ,

பொன்னே கண் கூசிட

அயோத்தியில் தான் நீ 

அழகாய் பிரவேசித்தாய !

சதை மட்டும் கொடுக்கா 

சிற்றன்னை மனமாற்றம் ,

குற்றமில்லா கணவனை 

வனவாசம் அனுப்பிய போதும் ,

கூடவே சென்று 

பொற் கம்பளத்தில் நடந்த 

இரு பாதங்களைக் கொண்டு 

இரக்கம் இல்லா 

ஊசிமுனை முட்கள் 

கிழித்தும், புதுப்பூ 

புன்னகையோடு 

காட்டிலும் பிரவேசித்தாய் நீ ! 

ஏனோ , மாய மானை வேண்டினாய் !

தேடிய கணவன் வாராமையால் ,

கொழுநன்  கோடு கிழித்துச் சென்ற கணம் 

வருகை தந்தான் 

விருந்தாளி இராவணன் ,

கவர்ந்த போதும் 

குடிசையுடனே ஆகாயத்திலும் 

பிரவேசித்தாய் நீ !

எல்லாம் முடிந்தது என

இமையோர் பெருமூச்சுவிட 

அயோத்தி உன்னை 

அரவணைத்து மீண்டும் 

அரங்கேற்றியது ,

கணவனோ உன்னைச் 

சந்தேக ரதம் ஏற்றினான் ,

நீ,

அக்னியிலும் பிரவேசித்தாய் !

சுந்தர காண்டத்தில் மட்டும் 

பிரவேசிக்க வில்லை நீ ,

உன் சூடாமணித்

துணையாய்

குடிசையைத் தாண்டாமல் 

கொளுவிருந்தாய் !

உன்னை இலங்கைச் சிறையிலிருந்து 

மீட்டது நீ தந்த சூடாமணி ,

உன்னை அக்னி ஜூவாலையிலிருந்து 

காத்தது உன் நேர்மை .

இன்றும் பல சமயம் 

சுந்தர காண்டங்கள் நிகழ்வதுண்டு ,

சூடாமணியாய் கல்வியை

காட்டி எங்களை நாங்களே

 மீட்டுக் கொள்வோம்!

உன்னைப் போன்ற சீதா பிராட்டிகள் 

ஊருலகில் ஓராயிரங்கள் !

உனக்காவது சூடாமணிக்குப்பின்

சூழ்ந்தது ஜூவாலை ,

எங்களுக்கோ சூடாமணி கல்வியைச் 

சூடும் வரை 

தினம் தினம் ,உன்போன்று 

ஆயிரமாயிரம் பிரவேசங்கள் ,

அதிலும் சிலவை

அக்னி பிரவேசங்கள் !