அணைந்து விடாதே!

இரவில் மேற்கொள்ளும் பயணத்தை வாழ்வின் பயணத்தோடு ஒப்பிட்டுப் பார்க்கும் கவிதை

 

 வழிகாட்டியும் நீதான் ,எனக்கு

வழித்துணையும் நீதான் ,

விளக்கொளியே ! அணைந்து விடாதே!

 

இந்த ஒற்றையடிப் பாதை

குழப்பம் தரக்கூடியதாம்,

ஏற்றங்கள் சட்டென சரியக் கூடியதாம் !

விளக்கொளியே ! அணைந்து விடாதே!

 

பாதங்களைப் பதம்பார்க்கும்

முட்கள் ஏராளம்,

விளக்கொளியே! அணைந்து விடாதே!

 

பின்னோக்கிப் பார்ப்பதில்

 பயனில்லை என்றார்கள்,

முன்னோக்கிப் பயணிக்க

விளக்கொளியே ! அணைந்து விடாதே!

 

புலியும் தோல் போர்த்தி பூனையாய் வருமாம்,

நரியும் உடைமாற்றி நாய்போல  வருமாம்,

விளக்கொளியே ! அணைந்து விடாதே!

 

சிறு பள்ளமும் கிணற்றின் ஆழமாம்,

கதிரவன் கதிர்களை இந்தக்

காரிருள் தின்றுவிடுமாம்,

விளக்கொளியே! அணைந்து விடாதே!

 

கடுகு சிறுத்த கற்களும்  

நம்மை தடுமாற்றி தடமாற்றுமாம்,

விளக்கொளியே ! அணைந்து விடாதே!

 

ஒளியைத் தொலைத்த பலருக்கு

நீயும் வழிகாட்டலாம்  ,

பலரின் விளக்கொளி நம் பாதை மறைக்குமாம்,

விளக்கொளியே! அணைந்து விடாதே!

 

கடைக்கோடியில் வரவிருக்கும்

கலங்கரை விளக்குவரை ,

விளக்கொளியே ! அணைந்து விடாதே!